مصابيب نباتية
من زمان و انا ابغى انزل هذي الوصفة. من زمان يعني من يوم ما بديت هذي المدونة. قبل سنتين
في مثل يقول، لا تؤجل عمل اليوم للغد
بس للأمانة و مثل اي شخص ما يخلص شغلة، عندي عذر
كم مرة اسوي وصفة المصابيب و مرة تضبط مرة و مرة ما تزبط
بس بطمنكم. بعد ما فشلت كذا مرة، عرفت "اسرار المصابيب" بس ثلاثة
- العجينة لازم تكون مخلوطة زين
- الخليط لازم يكون سائل اكثر من خليط البانكيك العادي
- على الصاج، نخلي المصابيب نحاف عشان تكون مستوية من جوا
ممكن ناكل المصابيب مع دبس التمر و فول سوداني و زباذي نباتي مثل زبادي الصويا، جوز الهند او اللوز. شراب القيقب، مربى طبيعية او مع بصل مطبوخ
مصابيب نباتية
المكونات
- ١/٢ كاس دقيق بر
- ١/٢ كاس دقيق شعير
- ١ كاس حليب نباتي
- ١ كاس ماء
- ١/٤ م ص كركم
- ١/٤ م ص كمون مطحون
١/٤ م ص زنجبيل بودرة
الخطوات
في وعاء كبير نخلط المكونات الناشفة مع بعض
- بعدين نضيف الحليب النباتي
- بعدين شوي شوي نبداء نضيف الماء
- نخلطة جيداََ ممكن نستعمل الخلاط هنا
- نحمي الصاج او القلاية على نار هاديئة و نستني الا ما تكون حارة
- بعدين نضيف قدر ١/٨ كوب من الخليط الى الصاج
- نقلب المصابيب بعد ٣ دقائق تقريباََ او حتى تختفي البقع البيضاء